Mésyé, médam, la sosyété koz èk moin sé koz avèk in kouyon-sé o pyé d’lo mir k’i oi lo mason. Mi koné pa si la plipar d’moun i rapèl kozman-la. Sa té dann in shanson karnaval si mi tronp pa. Mi koné pa pou kosa, mé lo bèrtèl dann ka la sé in madam : in listoir d’in bonom i ariv pa s’anpass son madam é kan inn lé la l’ot lé pa loin, é kan l’ot lé pa loin inn lé la. I fo dir galman demoun lontan té i marsh toultan avèk zot bèrtèl : étan pti moin la touzour vi bann bononm avèk zot bèrtèl alé la boutik pou pran komisyon sansa sort la boutik avèk komisyon pou artourn zot kaz. I di osi lé konm shoushoute avèk la mori é sa moin lé sir zot i koné kosa sa i vé dir. Alé ! Mi kite azot rofléshi la dsi é ni artrouv pli d’van. Sipétadyé !