« Koton mayi i flote, rosh i koul ! » – In kozman pou la rout

Na poin pli vré k’ sa ! Pars d’apré la dansité, in koton mayi i flote alé oir in galé, la plipar d’tan, i koul. Mi di la plipar d’tan pars moin lé pa sir k’in galé volkan fé avèk lo gaz kan i rofroidi, i koul sansa pétète i pé floté : moin la zamé vi, mé la pa pars moin la zamé vi k’i égzis pa…

Alon pa insis la dsi, mé zot i konpran lo ga la di sa pou lo promyèr foi li té vé dir sa i dépann la natir dé shoz. In koton mayi i flote, in rosh i koul, do boi i bril, lo sik i fonn. Domoun malfondé lé malfondé. Domoun zantiy é zantiy. Donk fo pa alé dann sans kontrèr dé shoz. O sinonsa ou lé riskab ète désiu ! Moin la déza antann demoun dann in véyé d’zistoir apré di : « Koton mayi i koul, rosh i flote ! ». Mé sa té arienk pou amiz la galri sansa pou atir l’atansion d’moun konm kan i di : « Kriké ! Kraké ! La klé dann mon posh, la tay dann out sak ! ».

Mé la pa lo provèrb an vré. O fète, kosa zot i anpans zot ? Fé travay z’ot koko, fé bouy z’ot matyèr griz, zot va oir si rant-rant, ni tonm pa, dé foi, dakor rantre nou !. Fé roulé férèr !