In kozman pou la rout

« Kou d’kongn i fé lèv lo pyé »

8 avril, sanm Justin

Pou in pratikan marsh pyé tou ni pandan lontan, sa sé in n’afèr lé vré pou vréman. Kan mwin lété dann pti lékol tout marmaye téi vien lékol pyé touni. Arzout èk sa, la plipar d’tan, shomin té an galé é kan in rosh téi prézant la tète ou lété gagnan : lo pli souvan té lo gro mpouss de pyé téi i gingn son n’afèr.la po avèk la shèr téi rlotourn alanvèr.

Romède l’avé pwin tro : inn doz safran avèk kékshoz gra ou téi anroul doi d’pyé dann in bout shifon é wi priyèr Bondyé pou la guérizon k’téi vien a son èr, sof si antre-tan ou la gingn in nouvo kou d’kongn, sak té ariv souvan dé foi pars sa lété konm in éman pou galé dann shomin.

Mé nou néna in provèrb i atann anou é li di si ou la gingn in kou d’kongn wi évitein dézyèm an lévan lo pyé. Sa i vé dir kan l’atriv aou in n’afèr dézagréab, wi fé atanssion pou k’i ariv pa ou ankor la mèm shoz.

Alé ! Mi kite azot rofléshi la dsi é ni retrouv pli dvan, sipétadyé.

Justin

Padport

Signaler un contenu

Inn modékri, inn ti lavi, inn komantèr ?

Témoignages - 82e année

+ Lus


2026 Témoignages