Dimansh dérnié dann in lémisyon télé diran dé zèr lo prézidan lé v’ni fé son sho. Lo léstasyon la invit osi bann jèn, banna i poz inn dé késtyon, lo prézidan i réponn. Oilali-oilala mwin prézidan, pou lèr, mwin la pokor fé, mé kont si mwin mi sar fé domin, pou la finans, konm mwin la déza di, mi okip, pou shomaz trakass pi, pou la rotrèt odrémié atann inn ti néstan, épatati-épatata. Lo disk té réyé, lé konm in vié rofrin zané swasant. Ou san konm si tousala i tyinbo pi. Toudinkou son gro kèr i lèv é sé lak li atak nout bann kamarad kominis fransé.

Kosa li di ? Li di konm sa « Bann moun fron nasyonal i babyi konm in trak lo parti kominis fransé zané swasant diss ». Sanm pou mwin momandoné li té dann la difisilité pou koz konm sa. Pou dévir la konvérsasyon li atak a li nout bann kamarad. Mi koné in takon kamarad rényoné té an frans dann tan la, kiswa té travay dann PTT, té dann la SNCF, kiswa ankor dann la polis, konbyin kamarad té i milit, lavé la kart PCF, donkalor té distribié trak, zordi zot i di a mwin zot i rosan tousa konm in linsilt, konm si lo prézidan i mépriz nout tout.

Néna i di sé in dérapaz. Si sé in dérapaz pou vréman kisa i anpèsh a li domann a nou éskiz. Si li lé prézidan zordi, zot i krwa pa kominis néna in gran par anndan la ? Momandoné mi domann a mwin si na pwin in tik-tak anndan la. Sanm pou mwin konm li néna in dèt èk nou, li dwa a nou bokou, tousala promès li la fé a nou, tousala promès li tyinbo pa. Sanm pou mwin sé in tik-tak, in vié téknik pa tro korèk, konm li dwa a nou, konm li kont pa péyé, pou pi awar a koz èk nou li profèr kass la kord èk nou. Sinonsa koué i ésplik son lévé d’fougad ?