Kan moin la parti l’ékol pou moin aprann lir, ékrir épi konté, pétète pass in sèrtifika in zour, la métrès la fé konmsi moin té in marmaye téi koné tout épi téi koné pa arien an mèm tan. El la zamé poz aèl konm késtyon ké mi konpran pa lo fransé osinonsa in si pti pé. El la pa poz aèl non pli lo mèm késtyon ké tout mon bann ti kamarad l’ékol. Dann tan-la lété konmsa ! Dann tan-la, l’ékol kolonyal lété konmsa !

Donk, moin la lir mon bann léktir. Moin la aprann ékrir désèrtin mo, désèrtin fraz : moin la fé dikté épi rédaksyon. Moin l’aprann fé lo kat z’opérasyon, pars sanm pou moin épi pou mon bann paran sa lété in n’afèr ké lété bon pou moin, konm pou tout bann z’anfan.

Solman oila, kan moin l’ariv l’ékol dann mon sinkan, kan mon bann ti kamarad la rant l’ékol dann z’ot sinkan, nout tète lété pa vid par anndan : nou té i koné di in bonpé z’afèr, nou téi koné fè in bann z’afèr. Mi pans mèm nou téi koné kèl koté lété nout gosh épi nout droit, ousa i lé dovan, ousa i lé déyèr. Mi rapèl pi k’in métrès, in zour la domann anou, kosa nou téi koné pou vréman.

Lé drol in n’afèr konmsa : l’été konmsi pou nout métrès l’ékol té i falé vid nout tèt pou armète d’ot shoz dodan. Shanj sak l’avé dann nout ganblo pou ar ranpli ali avèk d’ot shoz. L’été konmsi tout sak nou l’avé aprann kan nou téi koz é téi viv arienk an kréol rényoné lété pa bon pou fé arien ansanm. Pou nout bien, bien antandi !

Lé kan mèm drol mé ala kosa moin la pans desa ! Pou nout bien, konm di lo kont, téi vé koup nout bra gosh pou ranfors nout bra droit.