Médam, mésyé, la sosyété, mi rapèl lo tan la kord téi sèrv pou fé bonpé zafèr : la kord téi ansèrv pou amar koshon, téi ansèrv galman pou anmar bèf. Téi ansèrv dann tan siklone. In bon kord té i pé ral in sharète kan èl téi vèrs dann la kivète… L’avé pti kord, moiyin kord, gro kord, kord shoka, kord goni, la lign toupie. Konm zot i koné la kord, zot i konpran bien fors-a-fors la kord téi amaye é afors amayé, momandoné té près inposib démaye ali. L’èrla, demoun téi koup sa èk in bon kou d’kanif trann-dé é ala la kord koupé, é sirtou ala in kord i gingn pi ansèrv korèktoman. Sof ! Sof si ou i démaye ali é si ou néna lo moiyin pou moiyéné, lété posib-avèk l’adrèss épi avèk lo tan-pou démaye ali. A bien kalkilé, la vi tazantan lé konm in kord, avèk son bann problèm épi son difikilté : l’èrla ou i pé koupé-transhé, mé ou i pé galman rég bann difikilté inn apré l’ot, tèl fason i shanj la vi an kékshoz pli sinp, pli fasil pou améné. Alé ! Mi kite azot rofléshi la dsi é ni artrouv pli d’van. Sipétadyé !