Mézami, kossa kozman-la i vé dire : sinploman kan i pé garde in gran korde lé pa nésséssèr koupe in boute dossi. Si wi pé garde toute in n’afèr, alé pa koupe in boute dossi. Dizon sa sanss prope, mé kossa i vé dire dan la vi même ?

Alor pou konprande alon rapèl kossa i lé lo nœu gordien : d’apré la lézande sa in nœu difisil mèm pou défé – in problème la poin solission antouléka i oi pa d’solission – ébin koman rézoude in n’afèr konmsa ? Par in solission radikal. Dann lo ka lo nœu gordien par in kou d’zépé bien koupan. Avantaze : i règ la késtyon, inkonvényan : i règ pa an doussèr, pétète pa éfikasman, pétète pa définitivman.

Alor pou arprande noute lékspréssyon an-o la, sa i vé dire si wi pé règ in problème an doussère, règ ali an doussèr. Règ pa li dann la vyolanss.

Alé ! Mi kite azot rofléshi la dsi é ni artrouv pli d’van. Sipétadyé.