Matante Zélida la ékrir Justin :
Mon shèr nové, mon spès salté,
la moin té kontan, la moin té fyèr ! Kan méssyé Zanpol la débisk Élie Voiro. La pa anvoy dir, la larg ali sa dann télé. La di ali, konm de koi, li la pran déssi son list in fiéfé lotonomist, lé riskab mète an danzé nout frékantasyon avèk la Frans.
Bann télé la parti fé koz Élie Voiro : sète-la, la kri-kriyé, solman moin la pa tro antann pars mon kari flèr d’zoignon la mank ranvèrsé dnn fé. Mé sak moin lé sir sé k’li la pa di trouv gran shoz pou dir, vik la vérité-la, sa i blèss sa ! Alé, konm noré di Saint Rémy kan li la koz ansanm Klovis : « Kourb aou fyèr sicambre », é si ou i kourb pa, na moiyin donn aou in kou d’min !

Justin la fé aèl pou répons :
Mon vyé matante touzour dan lérèr,
mi konpran pa pou kossa ou na in rézoneman an ké d’bib konmsa. Moin lé a d’mandé si, pou sak i konsèrn aou — sa sé rant nout dé, alé pa dir partou ! — gro-mèr la pa méte zèf poul a-kouvé, épi la pa trouv moiyin sort ti-kanar.
Koman dann in famiy d’moun fyér koman nou, la nyabou sort in droite koman ou. Lé kontan kan i manyé aryink la mantri, i sèy donn demoun la krintiv pou aryin ditou, i ankouraz mové santiman, mové léspri.
Out kozman lé byin trouvé pars nout bann lé fyér, i koz avèk bon santimann moun, lo kouraz demoun, é i kourb pa l’do. Alors mi souète solman in pé i ékout komandman-la, i parétré Klovis la arvir Saint Rémy :"Kanb aou, vyé sikourb !".

Justin

NB : Bann sikanb-la, sa té may-mayé avèk bann Fran é Saint Rémy, d’apré sak i di, la batiz lo roi Clovis.