Kouto dan la grèss ! Lo rézilta zélékssion lété kouri d’avanss

14 novembre 2024, par Justin

Dopi komansman l’ané, bann Moris téi koné ,zélékssion dépité téi sava fé dann l’ané. Dsi la késtyonn date, sa sé lo gouvèrnman k‘i désside é sé la dsi ké li zoué konm toute lé zot gouvèrnman la zoué avan li- i fo shoizi lo moman lo pli favorab pou gagné é sa lé bien normal dann la démokrassi la Répiblik Maurice. L’avé si tèlman limyèr vèr dann syél gouvernman jugnauth ké toute bann zobsèrvatèr té paré pou rokonète par avanss la viktoir Garsson Aneerud. L’avé la route in pé partou, l’avé in nouvo laerogare, l’avé in nouvo piste pou l’avion dann Agaléga, lo bann shif téi amontre bann kouzin morisien néna lo méyèr nivo d’vi an parmi bannpéi afrikin. Arzoute èk sa Moris lété plassé dann in dinamik progré konm l’avé poin dann noute réjyon loséan indien.

Dsi lo plan internassional noute voizine l’avé ranporte in gran sikssé avèk la kondanassion langlétèr par la Cour pénal internassional, avèk la kondanassion par l’ONU épi in préssion internassional tèlman for ké langlétèr la désside larg lo kor épi rann Moris bannzil Chagos. Avèk lo lapui in gran péi-kotinan konm l’INN lafèr té fète é lalianss lo pèp lété dsi in trazéktoir pou la viktoir. Mé pou toute zobsèrvatèr l’avé kant mèm bann késtyon san réponss : pou kossa gouvèrnman l’avé pran la télé an otaz dann péi-la. Lopozission l l’avé poin son plass é gouvèrnman téi akapar toute. La pa konmsa in pli for i konporte ali é in pé téi komanss dir, kékpar lo zé té pipé Téi anparl pa ankor léskandal mé té pa loin. Ziska in zour lopinion i an apèrssoi lopozission lété éspyoné.

Dann son réakssion gouvèrnman la karssèr ankor in pé pliss bann média épi li la promète in paké zavantaz sossio é demoune té kontan mé la komanss domandé si sa la pa bann promèss lé pa possib tienbo é si bann zavantaz l’avé zot partizan zot l’avé galman zot bann zadvèrssèr... Si tèlman in somenn avan zélékssion la konfyanss la shanj koté é gouvèrnman la sisspann bann zavantaz sossio-donk la libèrté solon bann morissien- é la kanpargn la ashèv in pé dann la konfizyon.Kouto dan la grèss ? In rèv mé pétète inpossib pou réalizé. Sé konmsa ké lo réziltan anonssé lété 62-0 mé pa dann sanss prévi, mé ziss dann sanss kontrèr… Astèr lopozission lé o pouvoir avèk pétète konm i di zanguye sou rosh dann bann finanss piblik, avèk la vi dir pou bann morissien moiyin, épi pétète in rolassion anpoizoné avèk bann gran péi loséan indien.

Afèr a suiv konm i di !avèk lo méyèr po noute bann kouzine-kouzin Maurice é sé sak ni souète..

A bon antandèr salu !