Mézami, dan la vi i fo wi koné kossa wi vé. Si wi vé ti-kanar, fé kouv zèf kanar mé si wi fé kouv zèf poul, wi gingn ar pa tikanar-inpossib, définitvman inpossib. wi pé gingn bonpé zafèr si ou néna la volonté é si wi suiv la lojik-mé si wi suiv pa la lojik-i pé dir ossi la natur sansa la tradissyon — ou la pa pou gingn sak wi vé.

Lé drol mé sa i fé panss amwin bande kari sansa rogaye rovizité. zot i koné kossa i lé ? zot i koné déssèrtin kizinyé déor i vien issi La rényon pou ro-vizite noute kuizine. La plipar d’tan sa i fé in gran dézord dann lo landerno nout kuizine. Lé normal ! si wi vé fé in rogaye sossis, néna in manyèr pou fé sa, néna bande produi i sava d’dan, néna lo kou d’min, épi lo dégré d’zépiss.

Fé konm zot i vé, lé pa défandu, mé apèl sa otroman : noute kuizine sé nout kuizine, nout patrimoine sé noput patrimoine é oila, in poin sé tou. Alé ! mi kite azot rofléshi la dsu é ni rotrouv pli d’van. Sipétadyé.