Souvan défoi l’éta la pran in désizion san domann anou kosa nou pans, la fé in kouyonad. Apré sé nou té dan la kol jak ansanm sa. Légzanp i mank pa : la rout an kornish, la plantasion kriptoméria tousèl, transfèr bann TOS. La fé ziska lamanman Virapoullé ! Solman-la in gatèr la donn la min. Li la gingn lo droi pèsh la lézine : i prétan dir sü so késtion-la, son kanar lé noir.In bon pé gran fronksionèr i rod larg lo patat sho avan i poik zot min (avan bann zéléksion lané 2007)

So foi-isi, l’éta i rod roul anou kari sou d’ri sü la késtionn’ l’insinératèr.Sa lé pa bon pou nou. Sa la pa in bon solision pou trèt nout bann déshé : i fé soi-dizan in komité* épi, d’apré sak i di, i vé anvoy fèr fout avan komité-la i komans travayé.

Atoué, l’éta, zoué pa konm sa avèk nou ! Sé nou ki viv isi,La Rénion ! Sa in késtion i konsèrn nout santé. Kansèr an plis, sé nou k’lé riskab gagné.Bann madam La Rénion lé riskab fé bann fos-koush an plis. Sirtou na d’ot manièr pou trèt bann déshé : kapab raport anou lo gaz pou fé la kuizine, bann métal si lé bien trié, konpost pou mèt dann plantasion.**

Alor, i fo éspéré dann sis mois lo bann ki gouvèrn la Frans sora an shomaz, la pa bézoin banna i pran kont nout zintéré , in désizion an zobok. Manièr zot i vé fé, komsa mem i fo pa fé. I kolar pa sa koko : kouyon la pa nout nom d’famy !

*Instance locale de concertation (ILC) pour le traitement des déchets à La Réunion.

** voir “témoignages” du 6/12/06 : "mille et une façons de se passer de l’incinérateur"