Lo problèm bann léktèr témoignages i koné sé la baz militèr bann zanglé i loué bann zamérikin dann lil Diégo-Garcia. ! Olivier bancoult la rakonte anou koman zétazini l’avé fini par ète dakor pou in rotour lo bannbzil sou lotorité Maurice avèk la baz sou kontrol bann zanglé é lizaz par bann zamérikin épi in rotour bann shagossien dann péi natal..

Na lontan Méssyé Trump la di li lété dakor avèk lo trétéGB/Maurice é li té mèm kontan bann shagossien i arète soufèr par la pèrte zot péi. Mé sépa kèl bébète la pik ali pou dir néna dé zour lo trété sé in mové zafèr, mèm in gran kouyonad pars sa lé riskab mète an danzé la sékirité lo mond lib par rapor La chine épi la russie.

Pou kossa li di sa zordi ? Pars gouvèrnman bann zanglé lé pa dakor avèk son trikmardaz pou mète la min dsi lo Groenland épi pars zordi mèm bann dépité zanglé l’apré diskité pou ratifyé lo trété é mète an avan lo rotour bannzil Chagos sou lotorité d’Maurice épi lo rotour bann shagossiien shé zot.

Mi souète l’afèr i kontinyé son shomin é lo kalkil Donald Trump lé riskab foiré konm in bonpé sak li l’apré sèye fé… Nout rogré é sète bann shagiossien sé ké sète afèr-la i dir dopi pliss sinkantan é bann shagossien i vé rotrouv zot zil natal é si shoviye trump la grossi la pa l’afèr bann shagossien ni la n’ote bann sitoiyin losséan indien.

A bon antandèr salu ! La kouyonism é lo mové fon sé sak i done anou in lidé préssiz dsi léspri boushé déssèrtin gran dann lo mondé zot volonté rotourn dann tan la koloni.

Justin