Mézami, lé possib demoune va pran amwin pou in gatère mé sé in n’afère mwin l’avé dan lidé dopi inn-dé somenn a popré kan la done dépar lo gran rède é kan in ta avèk in paké d’moune déor la komanss débark Jilo. Antanssion mwin la zamé prétande d’ète in dovinère mé d’issi d’laba, in pé partou, sé sak nou té i antande dann kozman d’moune.

Biensir mwin téi di pa, mé sé sak mwin téi mazine dann mon kère. Donk mwin téi di, kan toussa d’moune déor sar fine alé, mwin lé sir tangaz i sava pété. Mé konm lo pli pire lé zamé sir, mwin téi di an mwin mèm, arivra-arivra pa, pétète sa la pa pou arivé. Mwin néna karaktère optimist, mi oi pa la vi an roze mé lé prèss konmsa.

Dan mwin mèm, mi panss préfé li ossi, li téi di konm mwin mé oila li l’avé tor : la maladi lété si tèlman apré dékliné, ké li téi di lé pa possib li sava arvni ankor. Li la pratike la métode doktère Koué, sak téi panss té sifi kroire mil pour san la maladi i vien pa pou èl pé vni... Mé oila, lo kovide i koné pa doktèr Koué, konm li koné pa mwin, é konm méssyé Préfé lé pa dann son frékantassion.

I paré astèr, toute mézir li la tir l’ote zour, li sava romète é avèk sa li sava sèrv anou dë doi d’sazèss, dann in gran vèr ranpli avèk roprosh san pran son par bien antandi. San di sé son fote pars li lété konm k’i diré, in foi an pliss, dann lo déni… Méssyé lo Préfé, vi koné mi prétan pa z’ète in dovinère kalifyé mé mi koné kozman kréol é sète mi di aou la i fo pa obliye ali.

li di konmsa : « I pé pa bingn san mouyé ! » é sa wi pé aplik ali in pé dann toute lokazyon.