Mézami, la pa bézoin ni gnor sak zot konm moin é konm d’ot komansman l’ané nou té i pans. Nou téi pans la maladi nou téi antann parlé, téi sava fé in karnaz Madégaskar. Mi rapèl ankor sak in pé téi di dann bann radyo : l’avé poinn mo pou mépriz nout bann kouzin malgash.

Zot i ansouvien pi ? Zot i rapèl pi sak bann konésèr téi di é fason zot téi di ? É koman dann bann konvèrsasyon téi gaskone lo promyé an parmi bann malgash, lo prézidan. In moun prétansyé, téi pans avèk son siro vyé moun Madégaskar lété kapab bat - atèr lènmi invizib.

Mé oila ké ni aprann zordi dann bann zoinal malgash, la maladi la gingn in kou d’rèss trankil é lé posib li sava kite lo poin santral l’aktyalité pou rant dann l’insignifyan. An touléka sé sak bann zofisyèl malgash i déklar dopi yèr é sé sak tout demoun i pé lir si zot i vé dann bann zoinal lo péi-l’express Madagaskar épi d’ot ankor… Antansyon lété pa inn parti d’plézir pars la lite kont l’énmi invizib la pa inn parti gagné d’ avans.

Malgré sa, i fo ni romark Madégaskar épi son gouvèrnman lété solidèr : lo péi la ède in bonpé péi konm lé komor, Sénégal, la Tanzani épi d’ot ankor pou konbate lo mal avèk siro d’armoise zot la fé, zot la invanté dann lo péi… La prèv pou ète solidèr, la pa bézoin ète rish é i sifi défoi d’in bonkèr épi lintélizans pou mète dann sèrvis lé zot.

Mé solman lé sir la maladi lé pa fini pou vréman. Antansyon èl i robonb ankor in kou, mé pou l’instan ni pé dir lo pèp malgash la fine mark désèrtin poin kont lo lénmi invizib... Pli pré ni apèrsoi Maurice i bèss pa la gard, é tanmyé... An parlann d’nou ni viv dann rogré gouvèrnman la pa vouli ékout bann rényoné : pa zordi pa domin nou va fini par konprann pou kosa é zi i fo mète lo doi l’androi i fé mal...