Mézami, éskiz amwin si zordi ankor mi artourn lo kouto dan la plé mé sé pou domann amwin si l’éta lokal, l’ars, épi toute sak néna in pouvoir dann domène la santé la fé vréman lo nésséssèr pou konbate l’épidémie.

Kèl lépidémi ? Mi vé pa parl kovid mwin-la pars néna a dir la dsi é prinsipalman kékshoz : olèrk viv san, la obliz anou viv avèk é a partir d’la, nou lé kondané amenn in drol de guèr konte in pandémi san konète kansa nou va oir la fin, si ni oi in zour la fin. Mé nou lé pa fini d’anparl sa sirtou k’isorte trouv in varyan rényoné é in pé i brandi sa prèss konm in viktoir, si la pa in bon nouvèl. Nou lé kapab ? Biensir mé mi pans néna d’ote manyère amontr nout kapassité.

Mi yèmré anparl la ding bien instalé issi La Rényon dopi plizyèr zané é la ossi lo viris i mank pa d’fé pti é band pti plizanpli mové konm ni pé oir sa dann laktyalité. Sa i pèrmète anou artourn in pé an ayèr, dann tan la fyèv palidéène. Mi rapèle pou élimine sa, l’avé in bonpé groupe téi sava partou zour apré zour, moi apré moi, ané apré ané pou konbate band moustik-la avèk la fyèv zot téi amenn partou.

L’ariv o bite konm ni koné, mé pou kossa i trouv pa lo boute la ding ? Sa la pa in maladi invinsib kant mèm, sirtou ké néna koméla plizyèr fasson pou konbate ali... A oui ! Néna in fasson i di aou, vide band sou-po flère pars ladan mèm moustik tig i fé son pti. I di ossi néna bande zékipe l’arss i sava konbate azot dsi lo térin. Néna ossi lo zistoir d’moustik male stéril band drone i larg sa. Kan lo drone i vé bien volé pars i paré Sin-Zozèf zot la pa lové. Poitan drone la pa sa k’i manke dann syèl rényoné !

In signe konm in n’ote dsi in movèz préparassyon. Fransh vérité, mézami, nou la tardé pou konbate la ding-la, pars nou téi di kovid, kovid, kovid é pandan s’tan-la la ding téi atake. Son viris téi mute é romute, roromute avèk bande form plizanpli grav… Alor kossa i fé astèr ? I konte ankor in kou dsi livèr pou fatig ali, si livèr i fatig pa li, kossa i fé, I dékrète in mobilizassion zénérale mé konbien divizion nou néna. Arète di sé rényoné la fote, pars la fote lé plito dann la movèz organizassyon, la mollèss lo konba, épi in l’énmi souzéstimé.

An atandan kabri i manz salade é sa sé in n’afèr ni koné bien issi La Rényon.