Nana pli lontan k’lontan mi ansouvien in moun té i vé pa son fiy téi pas sèrtifika. Alor li téi di avèk la métrès lékol : aprann lékol i ansèrv de rien,sèl bak li koné sé in bak dé san lit. Son fiy la kit lékol. Kinz an troi moi la maryé, apré lété an voi d’famy. La mal spasé, èl lé mor suit de koush.
Lo tan la pasé,mi sort trouv inn mon bann kamarad la pa invant zèf bouy, lapré splinn akoz son marmay la mèt dann son tèt li doi fé gran zétid. Pou moin lo marmay na rézon, pou li non. Li ardi amoin kozman moin la antann nana sitèlman lontan : na riyink in bak na lavalèr sé lo bak dolo.
Nout dé li té apré koz initil : lavé poin inn pou gingn rézon : solon moin, li lavé antour ali avèk in spès kok ; lé dir mèm mé solman i oi pa. Moin mon koté, moin lavé poin lo tik-tak i fo pou kas la kok-la.
Mi mazine kozman inbésil, i di konmsa :"Koz avèk in l’inbésil sé pèrd son tan !".
Pétèt konm pétèt pa. Lé vré konm pa solman la pédagozi- la, sa la pa in gouyav.

Justin