Mésyé, Médam, La sosyété, koz èk moin sé koz èk in kouyon-sé o pyé d’lo mir k’i oi lo mason. Figir azot in foi mi ékout radyo é in moun mi koné pa i di : « Mi sava koz kréol ! » é oila li mète a déklansh in shaplé d’jirman konmsi koz kréol sé d’ète grosyé. L’èrla, lo prézantatèr i di ali : « koz kréol si ou i vé, lé pa défandi, mé jir pa ! ». Lo moun i ropran épi i di : « Ou i vé anpèsh amoin koz kréol alor, ou i vé mi koz fransé solman. ». Lo prézantatèr l’arété pars konm Daniel Honoré téi di souvan : « I diskite pa avèk in kouyon, i donn ali rézon ». Zour-la moin la konprann Daniel l’avé rézon pou d’bon pars si in moun lé boushé a l’èmri, kroi pa ou i sava déboush ali-la pa ou va fé sa ! In n’ot ké ou pétète mé pa ou. Mé zami, la lang lé pa délika, ni grosyé par li mèm, sé lo lokitèr k’i shoizi son rozis dé lang é si li shoizi lo dou son kozman lé dou, si li shoizi lo amèr son kozman lé amèr, si li shoizi lo grosyé son kozman lé grosyé. La lang mé zami sé lo zoutiy é lo rézilta i dépann lo zouvriyé. In bon zouvriyé i koz bien, in mov é zouvriyé i koz tort. Alé ! mi kite azot rofléshi la dsi é ni artrouv pli d’van. Sipétadyé !