Mi souvyin byin sak in vyé gramoun té i di, afors la kolèr té i pran ali kan, dann radyo, sansa dann zournal-la-droit, in pé té i kritik son parti kominis. Inn dé foi, moin lavé mèm pèr pou son pos radyo : moin té i kroi ziska li té i sava kas lo zafèr !
Moin té i aspèr in pé son gaz té fine fané é moin té i di ali : inkyèt pa ! Sak banna i di lé si tèlman bète, si tèlman sa lé kouyon, mi pans pa Kréol i sar lès gob azot èk kalité kozman konmsa !
Défoi, li té i di : « éspéron ou na rézon ! ». Mé dé foi, sa té i mète ali pli an kolèr, vèy pa koman ! Alor moin té i souvyin, in zour li la tyé son bèf, kou d’poin pars té i vé pa boir. Par prékosyon, moin té i ékart in pti pé !
Li té i di amoin, konm an roprosh : « Alor, ou ossi, ou i pans i fo pa réponn in latak si lé tro bète, si lé tro gro, si lé tro rédikil. Kontinyé, la pa domin la vèy va gingn la batay la kominikasyon, pars la-dan-la, sak i kont, sé pa avoir rézon — lé myé kan ou na rézon — mé, souvan dé foi, sak i kont sé k’domoun i done aou rézon ».
Alors, provèrb i di : « koz èk in kouyon sé pèrd son tan ! ».
Sa lé byin vré, mé pa toultan !

Justin