Matante Zélida la ékrir Justin :
Mon shèr nové, mon spès salté,
Vi koné, moin té apré majine in n’afèr l’ote jour. Moin té i rogarde in fèyton dann télé é moin té i antann demoun té apré diskité pars zot té i vé pa i kass in vyé batiman pou arfé in gran a la plas. Demoun té i di, zot l’assé oir bétone zot landroi ! Alors, moin la majine out bann dalon rouj-de-fon té i vé aryink batir kan zot l’avé la prézidans la Réjyon. Moin noré émé ké zot i antan bann moun apré vanjé. Touléka, mi pans zot zorèy la siflé. Tok ! Pran sa pou toi.

Justin la fépou répons :
Mon vyé matant k’i koz touzour la boush rouvèr,
Mi èm byin antann lé shoz konmsa, mé lé rogrétan antann sa ! Akoz ? Pars kan nora plis in milyonn moun La Rényon, ousa va mète azot ? Dann kèl kaz si i konstrui pa ? Pars mazine in kou nivo la mèr i rogoumant avèk l’éshofmann klima. Koman va fé pou protèz bann landroi lé plate sansa an kré si i fé pa bann dig ? Koman bann moun va gingn déplasé si na poin lo trin pou amène azot in pé partou dann lo péi ? Ousa va fé l’izine ? É lo plantaz i pous pa dann l’o d’mèr.

Koz konm vi fé, sé rézoné, mé kèl rézoné mon dyé ségnèr ? Rézoné konm tanbour, asiréman.

Justin