Mi sort lir dann zournal in pti nouvèl déssi mésyé préfé : a s’ki paré, son kot-konfians i dégrènn, i dsann - i dsann - i dsann, i ariv o-fon sé tan isi… ! Zournal "Visu" i donn ali kat sir vin.
La pa pran lèr avèk moin, pars moin noré di :"mète zéro kalbas la fimé gran-boi !", épi fini èk sa ! In préfé i sava, in n’ot i arvyin : gouyav de Frans i intérès pa moin !

Solman nana in n’afèr dann lo pti lartik i bote pa moin ditou, sé kan lo moun i ékri :"Démyé li (lo préfé) té i koz an kréol, konm sa nou nora ri épi nora mark listoir".
Mark listoir ? La pa ninport dé ki i mark listoir ! Mé fé ri ? Moin la zamé antann blan-la koz an kréol, mé pétèt li nyabou ; pars nou mèm, ni nyabou fé nout fransé, an boulon, an kas-kasé, konm k’i fo, an varyété rézyonal, sof, mé ni gingn !

Mé di konmsa, koz kréol i ansèrv aryink pou fé ri. Si li vé pa di sa, mi dmann ali éskiz ! Mé si li vé di sa, mi domann ali réviz son zizman, sirtou mépriz pa nout lang.
Pars, tan kozé-piti-nèg, konm in pé i di, sa lé fini : kréol rényoné lé kapab byin figuir dann tout sityasyon : sak lé tris, sak lé kontan, sak lé an kay-malèr, kan i fo ésplik..., étsétéri-étsétéra la ké lo ra.
Koz kréol pou fé ri ! Solman ? Non mé vou-zot !

Justin