Matant Zélida la ékrir Justin :
Mon shèr nové, mon spès salté,
Moin la vi dann télé, désèrtin laba Sin-Pol la fé in konsèy minisipal dé pov. Dizon plito in pov konsèy minisipal san pouvoir, san z’éléksyon, in mèr pou fé sanblan. I fo dir osi, i fé arien si li ansèrv pa, pars la mizèr na pi isi La Rényon. Lontan l’avé la mizèr. Lontan kan in ségatyé, mi souvien pi lo nom, té i pé shant : "Ay, ay, ay, kout amoin zot tout, goni vid i tienbo pa d’bout !". La mizèr sé kan ou la fin, sé kan ou la fré, sé kan ou na poin in morso tisi pou mèt dsi ou... Oz di amoin na ankor d’moun konm sa zordi ! Oz aou ! Tout fason, bann gouvèrnman dan la Frans laba, droit konm gosh, la promèt diminyé la mizèr, é promès sé dèt, donk zot va réspèk zot parol é la pa bézoin in bann Roiyal Bourbon pou mord zot molé pou sa. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
I étone pa moin sak ou i di. Ou i di na poin la mizèr, mé ou i di osi gouvèrnman va fé lo nésésèr pou fé arkil la mizèr. Ou i trouv pa matant na konm in kontradiksyon ladan ? An plis ké sa, kan ou i di gouvèrnman l’apré okip dé sa, l’èr-la moin lé ankor pli trakasé. Pou kosa ? Pars in gouvèrnman bann rish i sousyé pa la mizèr d’moun. Zot lé si tèlman friké, zot nana in nivo d’vi si tèlman énorm ké zot i majine mèm pa demoun i pé èt dan la mizèr.
An plis ké sa, si nou lé dakor ké bann pov sé bann viktime dan la sosyété, i fo bann viktime lé alyansé pou trouv zot mèm in bon solisyon pou zot problèm... Isi nana près sinkant pour san d’moun dosou lo sèy povrété é près vin pour san dan la mizèr pou vréman. Ladan nana bann jènn, bann vyé, bann fam, bann bononm, bann z’anfan, é zot i goumant zour an zour. Donk, si olèrk rès dann fénoir zot i sort in pé dan la limyèr, zot i marsh dsi in sosyété inzist, mi pans zot na moiyin pou fé rokil la mizèr... Ala sak mi pans matant, é kant a zot kozman dsi la mizèr i égzis pa, épi sé bann rish k’i doi soubat kont la mizèr, kozman-la i fatig amoin — mi diré mèm i fatig mon tété ! — mi fé pi in kont ansanm. Konm demoun té i di lontan : "Koz touzour, moin la fin !"

NB : "Koz touzour moin la fin", sé in pé konm "Shant ton kont, domin ta fèt !", sinonsa konm dan la Frans in pé i di : "Koz touzour, ti m’intérès !".

Justin