Pou bann Rényoné konm mwin épi d’ote, sak i soubate dopi in bon koupe de tan pou donn noute lang kréol favèr dann noute péi épi toute son zinstitission sa sé in kékshoz i fé plézir anou... Pars afèr kashé : kan bann jenn téi partissipe bann konkour lélokanss dann la lang franssé é l’avé pwin konkour lélokanss dann la lang rényoné, mèm si souvan défoi mwin téi trouv bien sak zot téi di, l’avé kékshoz konm in manke, konm in rogré téi sézi amwin dann pyé d’kèr.

Pou kossa ? Pars mwin téi di la plipar d’tan , toultan franssé, toultan franssé, in lang la anprète anou é ni romèrssyé, mé zamé dann noute lang anou.Finalman mwin téi fini par roprosh amwin épi d’ote par rapor in sityassion linguistik konm sak nou téi koné- mi diré plito sibi. Dann mon kèr mwin téi di nout lang kréol rényoné, lo lang nou la fé, lé kapab di gayar zafèr ladan, zafèr sèryé, zafèr gadyam galman, i gingn dévlope noute panssé ladan é pou kossa i fé pa.?

Donk mwin téi di ziska,an mwin-mèm, pétète nou konm d’ote nou la pa fé lo pti léfor téi fo fèr pou fé monte noute lang in pé pliss anlèr ankor, rokonète ali konm in zoutiye pou dévlope in panssé mèm in pé difissil, pou an parlé touléka… Mi panss kant mèm sak pou mwin té in linzistiss téi done anou kouraz pou mète noute lang pliss anlèr ziska lo zour lo komité La kiltir i lanss konkour nou la anparl in pé pli an-o dann tèks mwin l’apré ékrir.

Boudikonte dopi troizan i fé konkour-la é d’apré sak mwin la lir dsi lo site la CCEE bann roganizatèr i doi pa rogrète sak zot la fé avèk lo konkour bann jenn épi bann proféssèr. Fransh vérité kan mwin la ékoute vidéo bann jenn zadilt rényoné la fé é la fasson zot la di zot kozman mi pé dir azot mwin la trouv sa gayar toulbon.

A bon antandèr salu !