Matante Zélida la ékrir Justin :
Mon shèr nové, mon spès salté, mi arvyin ankor in kou déssi voiyaz nout ti-prézidan i sort fé La Rényon. Mi san moin lé blizé ar-dévir la-dsi, vi k’zot, bann rouj-de-fon, zot i arète pa d’kritik ali. Noré fali li fé si, sansa li fé la, noré fali li di si, sansa li di la. Fransh vérité, mi oi pa kossa i donn azot lo droi di z’afèr konmsa, donn ali konsèy. Touléka, sak moin la romarké, sé k’li la pa mank trouv in répons pou toute armontrans la fé ali. Sak moin lé sir, sé k’li la rodi sak pou li lé bon pou La Rényon, li la tir la moral k’i fo dann Zéta-zénéro, é mi mète azot o-défi dir lo kontrèr. Tok ! Pran sa pou toi !

Justin la fé aèl pou répons :
Mon vyé matant k’i koz touzour la boush rouvèr, mi domann amoin si ou i konpran pa lé shoz, sansa si ou i fé sanblan. Pars son z’idé, an gro, nou la pa di nou lété kont. Sak nou la di, sé ké lo bann désizyon i pé pa, ankor, atann san-sète an avan k’nana in bon l’aplikasyon. Pars, ou va éskiz amoin, zordi ankor, nou lé konm z’atandré. Ni atann, ni atann, é ni oi pa arivé. La vi lé touzour tro shèr, bann jènn nana diplôme, travay lé rar konm korn lapin pou zot, mèm l’otonomi dann l’énèrzi noré a rodir déssi la késtyonn pri lénèrzi prop... té i doi goumanté pou bann prodiktèr épi ni oi pa sa arivé. Mi arprann ar pa toute son program. M’a dir solman : « Kozé lé bon ! Fèr lé pli préférab ! ».

 Justin