Samdi soir, moin té apré ékout zournal télé dann radyo : in drol lidé, mé kan ou lé pa out kaz, sansa kan loraz la fine détrak lo bistrak télé, ou i fé konm moin la fé, konmsa ou i antann in pé nouvèl. Dé foi, in pé mantèr.

Zistoman, ala k’lo tantine i mète a koz déssi référandome, prézidan Sarkozy i prétan roganiz pou la Martinik, épi èl i di konm de koi, sa i mète in pé dézord dann park kanar. Solo èl, zournal "Témoignaz" i di sa in bon n’afèr, li sré mèm pou l’otonomi, konm dann tan.
Méssyé Victoria i di la Martinik épi La Rényon sé pa lo mèm zafèr, moi sé-moi, é toi té-toi. Donkalor, fèrm ton boush. Fèrm ton boush ?

Bin oila, zistoman, moin la parti lir dann zournal "Témoignaz" samdi é moin la pa trouv sak lo tantine la di. Kantmèm, moin la arlir in kou lo lartik, moin la pa trouv son kozman.
Alors, konm lo poète Prévert noré di : « De deux choses l’une, l’autre le soleil ! ». Soi lo tantine la pa lir nout zournal, é alors èl i doi fèrm son také... Té-toi, fèrm ton boush ! Soi èl i koné pa lir konm k’i fo, alors La Rényon na poin aryink 110.000 ilétré, nana 110.001...
Moin k’i pansé té i falé konète byin lir pou prézant zournal télé. La, moin la fé in lérèr-la !

Justin