Souvan dé foi, lé énèrvan kan ou i oi gaspiyaz dovan out zié. Lé ankor pli énèrvan kan ou i fouy in pé é ou i fini par antann na poin riyin pou fé. Dan kèl ka par égzanp ? Kan la plui la tonm konm in vash k’i pis épi ou i oi l’arozaz piblik i done paké, konm si riyin nété. In ot l’égzanp, l’ékléraz piblik ? Kan ou i oi an plin zour, dann kèr batan solèy midi, bann prozéktèr, sansa bann lanp ordinèr apré i rès alimé konm si sé la nuit. Kisa in n’afèr konm sa la pankor énèrvé ? Dabor, pars lo gaspiyaz, sa i fio péyé. Ansuit, pars pou moin, la pa l’éstrésité prop l’apré tilizé, sé l’éléstrésité sal bazé dsi lo sharbon ou sinonsa dsi gazoil.

Donk, kosa ni souèt ? Ni souèt i gaspiy pa. Koman i fo fèr ? Dan désèrtèn vil, l’ékléraj i baz dsi l’énèrji solèr anmagaziné pandan la zourné é bann l’anpadèr i éklèr konm sa. Z’ékonomi pou fé pitié ? Z’ékonomi morso la bouji ? Kroi pa sa, pars sé in gro dépans pou bidjé in komine. Moin la lir par la, sa i fé ziska vin pour san bidjé l’énèrji pou in komine. I vo la pène fé atansion in n’afèr konm sa ? Bien sir, pars sé dépans moin pou in sèrvis mèm kalité.

Somèn dèrnièr, moin la antann lo mèr Sint-Sizane apré di, la komine la domann k’i instal bann z’orloj tèl fason ké la limièr i klèr in sèrtin l’èr é i tinn in sèrtin l’èr. Lo pli intérésan sé ké, solon li, nora in rotour dsi invéstisman dsi dé zan, é sa va pèrmèt fé in l’ékonomi 700.000 éro dan l’ané ; 700.000 pou pa dépansé, mèm si i fo pou fé kékshoz itil. Li na rézon, li na tor ? Inn-dé la di va plonj Sint-Sizane dann fénoir. Mé mi pans na z’afèr pli intélijan pou di la dsi plito ké di kozman la boush rouvèr.

Justin