Matante Zélida la ékri Justin :
Mon shèr nové, mon spès salté,
Vi voi ? Nana lontan mi di i fo fé in n’afèr konmsa : pa done larzann moun pou la po patat, mé domann azot pou fèr in travay pou vréman... kansréti inn-dé z’èr d’tan dan la somène. Sa lé si tèlman in bon l’idé ké méssyé Wauquiez, in minis gouvèrnman lo pti prézidan Sarkozy, la déside fé in propozisyon dann sans-la. Li la mèm propoz k’i diminyé bann minimom sosyal, konmsa demoun i travay pa i gingn ar pa plis ké sak i travay. Moin lé sir, bann rouj-de-fon i sava kriyé... moin lé mèm sir, in pé lo kardyak va lévé. Mé arien, i réform la Frans, ou sinonsa i réform pa ; Konm di l’ote : "Ala lo késtyon !". Tok ! pran sa pou toi !

Justin la fé pou répons :
Mon vyé matant k’i koz touzour la boush rouvèr,
Ala éstèr ou i ropran pou out kont kozman in moun nana la fès an or. Pars i fo an avoir la fès an or pou di in kozman konmsa. I fo ète konm sa pou mazine i fo diminyé bann minimom sosyal. Na poin assé d’moun pov dann la Frans, i fo arzout ankor in pé, é si possib konm kondane azot travay forsé, vi k’zot la pa shoizi.
Mi sort antann dann télé, isi La Rényon, nana san-soisant mil pèrsone i viv avèk lo RSA (lo zanfan RMI !). Mazine in kou, i fo trouv sink èr travay par somène pou shakinn, sa i fé près trant mil plas travay tan plin. Méssyé Wauquiez i pé di ousa i trouv in n’afèr konmsa ? Pli pir, li vé prann sa dann travay sosyal ; Sa i vé dir, li vé dégrade travay sosyal, pars sa in boulo i fo ou nana in kalifikasyon pou fé, n’inport de ki i pé pa fé sa. Arzout èk sa, si i domann bann shomèr pou fé travay-la, sé bann travayèr dann lo sosyal ké sar dann shomaz.
Lé ga, kroi pa sa i sort solman dan la tète in mad-max ! Antansyon, pars bann la droite-la, sa nana fizi pou tir dann koin : i aviz in n’afèr pou toush in n’ote, é moin sré pa étoné sa i sort dann léspri tort lo pti prézidan li-mèm. I fo pa lès sa konmsa ! I fo avèy sa konm lé dsi l’fé ! Pars in lou blésé i nyabou mord ankor. Oubli pa !

Justin