Krab, konm nout tout i koné i marsh par koté, é sa lé vré do tou tan é la pa bézoin tout in lédikasyon pou aprann bann pti krab marshé pars sa sé in n’afèr natirèl. Astèr nou lé dann in provèrb é konm mi di toultan, li néna son sans prop konm son sans figiré. An parlann sans figiré, ni pé di, mèm si ou i koné pa bien fé kékshoz ou i pé amontr out zanfan fé in n’afèr. Mi souvien in momon bann zil komor té i koné ni lir ni ékrir dann la lang fransèz, mé sa la pa anpèsh aèl suiv son bann marmaye. Mèm li téi fé résite azot léson é par l’asirans son marmaye èl téi konpran si lo marmaye téi koné son léson sansa si li téi koné pa. Alé ! Mi kite azot rofléshi la dsi é ni artrouv pli d’van. Sipétadyé !