Figir azot, in zour, li sava avèk son kamarad pou tir lo ni paye-an-ké. Lo ni lé dsi l’bor ranpar é li akrosh dsi lo bor avèk son dé min, son kor dann vide, épi son kamarad i déssann an suivan son kor ziska son shoviy pou alé takine bann ti paye an ké dann ni-in trou d’kap par l’fète.

Mé oila ké lo kamarad, la min i komanss glissé. L’èrla li di : « Kokol, mon min i gliss ! kossa mi fé ? ». Kokol i fé pou réponss : « Krash dann ton min va kol pli for ! »... Mézami, dann tan marmaye téi frékante la kanpagn, sansa la foré, sansa lo bor d’ravine, in sityassion konmsa té pa rar é lo bande zaksidan té i sava avèk non pli !

Parti konm lé parti, mi souète lo dé marmaye la sorte intak dann zot mézavantir, mé mi mètré pa mon min dann fé pou zot. Antouléka, si mwin néna in konsèye pou di azot, si zot i sava dann la ravine, sanssa dann ranpar, alé avèk in moune sèryé, méfyé bande kokol konm mwin la rakonte azot la.

Alé ! Mi kite azot rofléshi la dsi é ni artrouv pli d’van. Sipétadyé !