Lé posib zot i koné pa zistoir kokol-Maryote pars moin mèm la zis antann parlé mé mi koné pa pou vréman tout bann zistoir pèrsonaz-la. Figir azot, in zour, li sava avèk son kamarad pou tir lo ni paye-an-ké. Lo ni lé dsi l’bor ranpar é li akrosh dsi lo bor, son janm dann vid, épi son kamarad i désann lo long son kor ziska son shoviy pou alé takine bann ti paye an ké. Mé oila ké lo kamarad, la min i komans glisé. L’èrla li di : « Kokol, mon min i gliss ! kosa mi fé ? ». Kokol i réponn : « Krash dann ton min va kol pli for ! ». Alé ! Mi kite azot rofléshi la dsi é ni artrouv pli d’van. Sa i vé dir sinploman si in zour ou i ékout in moun konm kokol Maryote dann in sisyésion, konm zot la vi, lé pa tro katolik ébin ou lé riskab agrav sèryèzman out ka. Sipétadyé !