Médam zé mésyé, la sosyété, koz èk moins é koz èk in kouyon, mé sé o pyé d’lo mir k’i oi lo bon mason. Mézami, kozman moi n la mark an-o la, mi pans zot i koné sa é dopi in bon bout tan. Moin la antann sa dann in shanté. Moin l antann sa dan la kour lékol, é bien antandi lo sans i doi pa éshap azot. Sans prop pou komansé, la pa bézoin ou lé sharjé avèk diplom pou ou konprann sa. Sans figiré aprésa, sinploman si ou i pran in risk mal kalkilé, ou i pèye lo konsékans. Gramoun lontan téi di : Pran prékosyon, sansa ou i koné pa kosa i pé ariv aou é sa lé bien vré. Sha shodé normalman la pèr lo fré, mé défoi li la pa pèr arien é sé konmsa ké li pèy e lo konsékans. Alé ! Mi kite azot rofléshi la dsi é ni artrouv pli d’van. Sipétadyé !