Mézami de tou tan, issi shé nou konm in bonpé landroi krédi la zamé an avoir in bon répitassion : li lé fassil pou dépanssé é li lé dir pou ranbourssé… Mi koné pa si zot i rapèl lo déssin l’avé dann la boutik fitintan. In koté l’avé in komèrssan plito gra épi la lézann « li téi vann o kontan » é l’ote zimaz téi amontr in moune mèg mèm, potéké fo oir avèk la lézann : « li téi vann a krédi. ». Sé dir azot la répitassion lo krédi.

Astèr, dann la sossyété ni viv, zot i koné, ni vé-ni vé pa mé nou lé blizé pass par krédi é sof si ni kashyète noute larzan dann té d’oréyé, nou lé blizé fé krédi pou avoir in kékshoz pou nou. Mé alon pa obli in n’afèr an parlan d’krédi : wi gingn krédi si ou néna larzan sansa si wi sava an avoir, si ou na pwin é si ou lé riskab pa gégné, la porte krédi lé fèrmé pou ou. Doublé-tour siouplé.

Alé ! mi kite azot rofléshi la dsi é ni artrouv pli d’van, sipétadyé.

Justin