« Mi di ali de fèr vite, pour k’li soi pa an rotar ». Konm Célimène té i di : « Ki kozé, langaz ki kozé ! » Sa mem kozé mélanjé. Tansion, la pa rienk in pti pé dmoun i koz kréol mélanjé, nana in bon pé dmoun i koz konm sa.
Akoz sa ? Na dé foi, ou na in nafèr pou di, épi ou lé abitié koz la-dsï rienk an fransé. Alor, ou may lé dé. Na désèrtin moun, i anvoy konm l’arivé. Konm i koné koz in pé fransé, i fé in zanbrokal, kréol-fransé.

Na dmoun i vë pa fé lo nouar alors i may kréol sanm bann règl la lang fransèz.
Epi, si ou la fine alé dé grin lékol, ou vë demoun i koné ,sré-t’i an mayan in pti sibzonktif landroi i fo, sansa landroi i fo pa. Na dé foi, i may lé dë pou farsé, pou fé ri la boush : bann komik i em fé sa.

Oté, lé ga ! Shak lang nana son bann règl, son bann tik-tak pou bien marshé. Mèt pa in rou traktèr sï in katrèl. I risk fé in lamayaj, kalbité. Pou konèt, i fo aprann, bann règl dann kréol, konm bann règl dann fransé. Anon aprann épi anon tash moiyin évit lo kozé-mélanjé.

Justin