Si i parl in lang dann radyo sé pou amélyor lo sti épi done in kontenu kiltirèl lo bann parol lo l’animatèr, mé lamétéo an kréol sé abèss la radyo épi sirtou pa done in lémissyon in karaktèr kulturèl.. ; Mi doi dir azot si mwin l’avé antann in n’afèr konmsa néna in sèrtin tan, mwin noré ziss anvi abime lo radyo, mé koméla sa i fé dsi mwin konm lo dsi fèye sonj.

Pou kossa mi di sa ? Pars mi panss sèryèzman in prodikssyon an kréol rényoné an pliss si sé in bon prèstassyon — sa i pé ziss aporte nout lang in sipléman pou son valèr kiltirèl dann la kréassyon kiltirèl. Donk, fo pa kriye lassassin kan wi anrtan dann la lang kréol dé shoz ou la pwin labitide antann. Myé ksa wi doi goute ali, apréssyé ali, gingn in kontantman siplémantèr an ékoutan la radyo dann in préstassyon ou lé pa abityé.

Mi pé dir mèm i fo ète fyèr kan wi antan kékshoz konmsa pars sé dann in lang nout pèp la fé ké ni antann parl sé shoz-la. Pars de toutan nout lang kréol rényonèz sé in lang kiltir popilèr mé zordi avèk bann konpléman bann kréatèr i aporte ni pé dir, nout lang-la i goumante son bann zapor kiltirèl é sa sé in n’afèr ni doi rafolé.

A bon antandèr salu !

Justin