Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Kriké ! Kraké ! Kan in fasilité i shanj an difikilté : la shass kanar !

samdi 28 mars 2020, sanm Justin

L’avé inn foi, pou innn bone foi, mésyé lo foi, la manz son foi èk in grinnsèl.
Zistoir mi rakont azot zordi la pa vréman in zistoir rényoné pars mi souvien moin la lir sa dann mon liv léktir kan moin lété dann kour moiyin. Donk mi sipoz sa in zistoir fransé mé mi anprète kant mèm zistoir-la pou évite parl ankor in kou l modi maladi, nout tout i viv avèk dopi in sèrtin tan...Listoir mi rakont azot sé sète in shasèr. Li la parti la shass épi li la pa trap arien. Ala ké toudinkou li pass in l’androi l’avé in gran bassin dlo… konm létan Sin-Pol a popré. Dsi létan li oi in bonpé kanar in pé tout kalité maskarin, batar, kanar blan, kanar noir.Anfin dizon in gran troupo kanar.

Kriké ! Kraké ! Kriké Mésyé ! Kraké Madam !
Donk lo shasèr i avans in pé dann shomin pou li alé oir lo bann kanar do pré :lété joli pou vréman, épi sa téi piaye dann lo la. Sa téi fé :kan !Kan ! Kan ! Kan ! é lo bann gro mail i réponn :kansa ! Kansa ! Kansa épi, sa téi fons inn déyèr l’ot, téi plonj pou alé trap kisoi poisson, kisoi lo vèr an touléka pou trap in n’afèr….Kan li ariv koté lo bassin, li oi in jennjan. Solon li sé lo véyèr d’kanar pars i oi lo ga i avèye mèm bann kanar, i gardien sa vèye pa koman .
Alor in l’idé i vien dann son tète, in mové l’idé sanm pou moin.Li sava ziska l’androi lo jennjan i lé épi li di :
« Bonzour jennom, moin la parti la shass é moin la pa trap arien, mèm pa in zoizo. Astèr si mi rotourn mon kaz tèl ke, néna in pé va gaspiye amoin.i diré mi antan déza in pé apré di : li la parti la pèsh épi li la trap lékime !Li la parti la shass é li la mèm pa trap in zoizo !.Jennom, m i vé pa rotourn la kaz tèlke, ou i pé pèrmète amoin tyé in kanar..Moin sar rokonésan é m’a pèye aoul o pri an konsékans. »
Lo ga i di pa arien malgré sa lo shasèr i trap in pé larzan an pyès é an biyé i done lo ga.Sète la i pran : i rofiz pa in kado konmsa.Lo shasèr i épol épi i viz in bèl kanar kol blé é li tir dsi.Fizy i fé Banm ! é lo kanar i tonm.Lo shasèr i trap lo kanar épi li mète dann son sak I apèl zibésyèr- lo latète épi lo kolé i pandiy an déor d’ lo sak.

Lo shasèr i vé alé konm pa é li ardi ankor in kou :
“Jennom, moin la parti la shass é moin la mèm pa gingn in zoizo. Astèr-la moin lé sir kan m’ariv la kaz in pé I sava gaspiye amoin”. Mi antan déza in pé apré di : « Li la parti la pèsh li la trap lékime ! li la parti la shass é li la rotourn brodouye ! ». Jennom, mi vé pa rant la kaz tèlke, ou i pé lèss amoin tyé in n’ot kanar. M’a pèye aou an konsékans...Ala li ardone larzan lo ga an pyèss é an biyé.
Li épol son fizy, sa i fé Banm ! In bèl kanar batar i mor.Li ramass lo dézyèm kanar épi li mète dann son sak i apèl Zidbésyèr.Li fé konmsi li sava mé li artourn oir lo jennom.Mé sète-la i kal ali épi i di :« Mésyé lo shasèr ou i fé sak ou i vé, moin lé pa la èk sa, pars moin lé ni propriyétèr lo troupo kanar , ni gardien.Bann kanar-la i konsèrn pa moin ! »Lo boug lé bien annuiyé é si astèr lo vré propriyétèr i karsèr ali.Li fé ni inn, ni dé, li pran son zanm a son kolé é li lé parti tout vitèss an éspéran k’i ariv pa li arien.
La moral listoir sé ké souvan dé foi la fasilité i shanj an difikilté.Port atansyon in laksyon inkonsidéré .Kan ou i kroi ou i aranj aou sé l’èr k’i déranj aou ankor pliss.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus