L’avé inn foi pou inn bone foi, mésyé lo foi la manz son foi avèk in grinn sèl

Donk l’avé inn foi in bonnonm. Li l’avé zoli-zoli kaz kisoi dann la vil, kisoi dann la kanpagn zoli-zoli bitasyon. Li l’avé galman gayar vésèl an or épi an larzan, bann mèb dékoré téi fo oir épi ankor bann kaross doré–d’arzan. Mé oila, malorèzman bononm-la l’avé in barb blé é sa téi rann ali vilin épi kalkilé pou fé pèr d’moun, si tèlman demoun téi rèss pa dovan li é la plipar d’tan zor téi taye la briz.
Kriké ! Kraké ! Kriké Mésyé ! Kraké madam !

Bononm-la l’avé in voizine in dame la ote, é voizine-la l’avé dé fiy. Lo boug la dmann inn an maryaz mé ni l’inn, ni l’ot téi vé maryé avèk li pars zot lété pa désidé pou maryé avèk in bononm l’avé barb blé. Arzout èk sa, é sa téi fé pèr azot ankor plis sé ké lo boug té fine maryé avèk plizyèr fiy épi pèrsone té i koné pa kosa l’avé ariv azot.
Barb Banlé pou fé la konésans l’amenn lo dé fiy, z’ot momon, épi dé-troi méyèr zamiz zot l’avé pou fé in pti sézour dann in mézon li l’avé kékpar dann in kanpagn. Zot la rèss uit zour plin. Uit zour pou promné, pou alé la shass, la pèsh. Uit zour pasé an ti-fine, an fèt épi ropa, fèstin mi anparl mèm pa zot. Tout la roul ron si tèlman ron ké la dézyèm fiy la komans trouv lo Barb-Blé lété bien émab épi bien onèe, si tèlman lo maryaz lété bouklé sito ké zot la rotourn an vil.

In moi la fine pasé é lo mari la di avèk son madam li l’avé in voiyaz pou fé dann in provins in pé loin é li sré pa la o moins si nk-sis somenn par-la é si èl téi vé èl téi pé fé vnir son bann zamiz pou amiz tanpir k’i pé. Mèm alé dann la kanpagn pou bien profité késtyon manzé épi késtyon plézir, sa téi mank pa. Aprésa lo mari i di avèk son madam :« Ala tout mon bann klé : ala sète bann gard mèb, ala sète i rouv landroi mi mète mon vésèl an or épi an arzan-sa i ansèrv pa tou lézour-, sète i rouv mon kasète bijou, épi in pass pou rouv tout bann zapartman. Pou finir, ala in pti klé : pti klé-la i rouv mon pti kabiné dann bout kouloir an ba. Ou i pé alé partou, ou épi out bann zamiz, rogard tout zafèr mé sa pti kabiné mi anparl aou, mi défann aou rouvèr sa é si ou la ouvèr mi prévien aou mon kolèr sar térib. »
Lo madam la promète son mari réspèk son volonté é obéi ali dann tout son rokomandasyon. Lo mari i mont dann son kaross épi parti pou lo voiyaz.
Kriké ! Kraké ! Kriké Mésyé ! Kraké Madam !.

Bien antandi bann bone zamiz la pa atann i mète aznou dovan zot pou zot prézant shé lo nouvèl maryé, présé pou oir tout bann rishèss épi tout mèrvèye l’avé dann la mézon.. Pars kan lo Barb-Blé té la zot l’avé tro pèr rann banna vizite, si tèlman lo Bzrb-blé éi fé pèr azot.. Ala ké zot i vizite lo bann shanm, lo bann pyès,, lo bann l’armoir, lo bann tapi é tout kalité mèrvèye l’avé dann lo palé Barb-Blé. Tout té zoli : kisoi lo bann mèb, kisoi lo bann géridon, lo bann tapisri lo bann tablo lo li, lo sofa, bann miroir, tout zafèr pli zoli lé inn ké lé zot. Mé konpliman an konpliman lo bann zamiz téi vé sirtou rouv la port lo kabiné interdi.
La nouvèl maryé, son koté, kiryozité li komans souk aèl si tèlman for k’èl la larg son bann zamiz épi èl i dsann in pti léskalyé bien kashyété ziska mank kass son kou troi foi pou ariv dovan la port lo pti kabiné son mari l’avé défandi aèl rouvèr. Kan èl l’ariv dovan la port, èl la rèss in n’éstan san bouzé pars èl té apré kalkil kosa son mari l’avé défann aèl fé épi èl l’avé pèr i ariv aèl kékshoz pa bon si èl téi dézobéi Mé oila son tantasyon lété tro for pou rézisté. Donk èl la trap lo pti klé é avèk la tranblad èl la rouvèr lo pti kabiné.
Pou komansé èl la pa vi arien pars bann fénète lété fèrmé mé firamézir èl la komans dovine in pé lé shoz…

Promyé morso la fii é samdi proshin nou va oir lo dézyèm bout. – lo zistoir BarbBlé la pankor fini.