Oté

Kriké Kraké : Lo moun la vann son l’onbraz Grandyab-dézyèm morso

Justin / 18 zanvié 2020

JPEG - 43.6 ko

Donk konm moin téi di azot in jenn moun in pé oki, la désid vann son l’onbraz Grandyab kont in bours ranpli avèk bann pyès an or. Solman oila, kan li la parti ashté sak téi plé ali avèk tout l’or lo dyab l’avé done ali, bann magazin la rofèrm dovan son figir shak foi bann komèrsan la vi li la pi l’onbraz… Lo marmaye la parti oir lo dyab épi la di ali : « Dopi moin la vanna ou mon l’onbraz, moin lé ankor pli maléré pars so kou isi avèk tout mon l’or mi fout gingn pi ashète arien par raport bann komèrsan i vé pa vann arien demoun na pi l’onbraz. »

Aprésa li di Grandyab : « Par pityé, rann amoin mon l’onbraz é mi rann aou out l’or. ! ». Lo dyab la fé pou répons : « Ou i koné moins é in bon boug é mi vé pa annuir aou ! Donk mi rann aou out l’onbraz, mé ou i aksèp vann amoin out l’am. ». Lo jenn boug la vni pal konm in dra simityèr pars li la pans si é pou vann son l’am épizapré bril a titré dann roiyome lo dyab, i vo myé pa. Li di lo dyab : « Mi rant pa dann out konbine, mi vann pa ou mon am, émi rann aou out l’or. »

Mé oila ka toudinkou l’or la transform an san é Grandyab la di : « Rann amoin mon l’or ! Ladan néna dé milyon é si ou i rann pa, m’a mète aou a travaye forsé trant ané d’ran. Ou i vé, ou i vé pa, sé ou k’i doi amoin in fortine. ! ». Lo marmaye, so kou isi la vni vèr épi li la di : « Grandyab mi rokoné moin la shanj out l’or an sann. Mi rokoné mi doi aou in fortine é m’a travaye pou rann aou, mé mon l’am lé amoin, lé pa aou é ou i gingn ar pa li. ». Grandyab la di li : « Dakor, mé a partir d’jordi, ou sé mon zésklav é ou va travaye pou moin, èr pou èr, zour pou zour, somenn pou somenn, moi pou moi, ané pou ané ziskatan ou va krèv konm in bèf sou lo joug. »

A suiv - i tard pa pou lo troizyèm morso.