(page 16)

Mi sava pa téat toulézour, mé "Lézann kréol" té in tit té ral amwin tro. Té rapèl amwin mon zèn tan, èk zistwar pépé. Alors kan mwin la rant dann téat, lavé gro lémosion si mwin. Lémosion épisa la pér osi, akoz mwin té koné pa koman bann lézann noré siport so saroyaz ant lo kozman, lo liv, pou ariv dann téat.

Byinsir mwin la pa rotrouv minm zafèr. Sak la vréman mank amwin, sék navé pwinn kriké, navé pwinn kraké. Mi trouv vréman domaz la pa gard rituèl-la dann téat. Akoz sa té fé koz anou ansanm lo rakontèr d’zistwar.

Lo zistwar té dos. Mwin na pwin ryin pou réprosh lo bann kontèr, sinon parfwa té in pé tro dann stil komédyin, inn ti gine tro téatralizé par moman.

Té promyé fwa mwin té war in moun dir in zistwar alonzé atèr, oubyinsa èk bann ti poupé. Mé mwin la viv lo zistwar èk tout la bann, mwin té wa lo batay doub kot kom si té dovan mwin.

Inn afèr té vréman gayar té lo bann zé d’limyèr, té plonz aou dann linivèr bébèt. Inn ot zafèr té vréman barok : la mizik blues-rock, té ki may byin ansanm lo rakontaz. Si ou giny pran lo tan pou alé war par ou minm, alé ou va war. Ou va di amwin apré si ou osi ou la trouv sa gayar.

Justin