Zot i koné gnor in n’afèr sa lé fassil épi sa i ariv toulmoune é opliss wi rode, opliss wi shèrch, opliss wi oi si wi koné in pti pé néna bonpé zafèr wi koné pa, si wi konpran in pti séktèr in n’afèr, wi gnor in gran kartyé dé shoz.

Si wi ékoute déssèrtènn radio, wi antann bann résponssab épi bann zélu an partikilyé, sa i fé pa arien, é sa i pass lo tan anpliss rien fèr, détourn larzan piblik. Lé vré opliss wi monte o, opliss si out kilote lé déshiré sa i oi. Mi rapèl in provèrb l’Afrik i i konmsa : « Opliss lo sinz i monte an-o, opliss i oi son déryèr »

Dann la kritik, sak mi romark sé k’lé fassil kritiké sirtou si wi rèss dann laparanss dé shoz.I di pa dann nout kréol « in pé i sava la pèsh pou trap lékime » alé oir lo bi sé d’trap poisson…

Ni koné zot i fé bonpé zafèr pars ladministrassion i done azot bonpé pou fèr é bien antandi tro pé d’moiyin pou fèr sak i fo fèr… An pliss, souvan défoi mi poz amwin késtyon, mi di kissa i pé fé tèl shoz ; Kissa lé konpétan, é kissa lé pa konpétan dann la montagn konplikassion lo lézislatèr la mète dsi nout shomin pou alé dopi l’ idé ziska la réalizassion.

Alor, mézami dabor si nou téi sèye oir sak i fé avan d’di k’i fé pa arien. Aprésa ni sèye oir si sak lé fé lé bienfé sansa lé mal fé é sirtou ni garde bien kèl lidéolozi lé dsou in prozé pars sa lé drolman inportan é sirtou ké ni obliye pa nou lé dann in rézime néo-kolony al é ké ni obliye pa lo kolonyaliss, dabitid, i sorte par la porte é li rant par la fénète-sé sak i pé ariv anou, é kontinyé ariv anou, si ni tienbo pa kont de sa.

A bon antandèr salu !

Justin