Mi koné pa si zot la antann dann radio demoun anparl in kriz I sort arrivé. La pa promyé foi li ariv mé so kou isi demoun la kozé pars téi ariv zis apré la Kriz zilé zone. In bonpé l’éstasyon l’avé pi lo gaz an boutèye donk demoun lété bien anuiyé pou fé kui z’ot diné.

Lo bann konvèrsasyon lété ziska siréalist. In pé té I di : mi rès dann sint-sizane, lo bo péi, é mi rode in éstasyon pou gingn in boutèye de gaz, mi marsh dopi troi zour mé san trouvé é san gagné. In n’ot I di : moin néna in boutèye vèr, mé l’éstasyon I pran pa boutèye koulèr la. L’ot ankor apré di : mi shèrch in consign zone, mé la poin koté la kaz. Apré in pé I souplègn : moin la pèye in gaz 28 éro, in consign 130 éro. In n’ot I di : la ké dovan l’éstasyon I trap sinkant mète é moin la sh… avèk sa.

In zimaz I arès dann mon tète : in meme mi pans I sort Mayotte I port lo boutèye in koté, son pti zanfan I port lo boutèye par l’ote koté, I sava éstasyon an éstasyon pou rode so famé gaz, so lindispansb pou fé la kuizine. Zot I rant dann léstasyon mé pèrsone I koz pa avèk zot. Pèrsone I domann pa zot ké ou koi. Zot I aspèr in bout tan apré zot I ropar. Sosyété imène ? Néna ankor pou rovoir.

Poitan, konm mi kroi, la pa l’énèrzi I doi mank anou. Lo gaz, mé sa I pé fé avèk lo biogaz, avèk bann déshé tout kalité, avèk la mash kann, avèk fèye. I pé fèr : OK !, Mé si I fé pa. Si I less solman bann monopol fé la plui épi lo move tan, nou lé pa sové.

Mi souvien dann in péi I apèl Lo Kénya, dé jenn disète an, pansyonèr dann in gran lisé san kouran, san gaz la désid ansèrv lo bann Wc pou klèr zot lisé, pou fé kui manzé dann lisé é zot la fé. La poin la ont isi La Rényon don ? Sak dé marmaye I gingn fé, nou nI gingn pa. La kriz ? El néna bon do la kriz. La kriz lo gaz : el néna bon do mèm si sé in kriz san rézon valab.