Mi vé pa anparl bande rényoné sak i ansèrv dolo normalman- é la plipar d’moune i ansèrv dolo normalman. Sa i vé dir zot i gaspiye pa d’lo par rapor la kantité nou néna.Sak i gaspiye sé sak i jète 40% nout lo avan ké li ariv ziska robiné .Sak i gaspiye sé sak i dévèrs dolo an kanyité dann por sintèroz nuitézour, zourénuite konm mwin la rapèl azot sa yèr..

Mi doi dir méssyé lo préfé avèk bande fermyé d’lo i angante anou pou ékonomizé . Sa lé bien mé si zot l’avé pa anfèrm anou dann la lojik lo gaspiyaz nou noré pa trouv anou dann in sityassion konm ni lé zordi.. Alon évite parl lo tinélyé pars sa ossi té in n’afèr-in n’afèr pétète la pankor fini vi k’i anparl pi anou dsa ziska zordi alor ni pé lèss noute limazinassion trafiké.

Mwin noré bien inndé métode dann tan lontan pou konséyé :par égzanp mi rapèl kan l’avé la séshrèss, noute kuré téi invite anou pou fé in neuvène pou domande Bondyé pou fé tonb la plui mé sa Lé pi d’aktyalité sirman .Lèss tonbé, alon aparl ote shoz.

Dizon ! mé akoz ni fé pa partou konm Tampon avèk bande rotoni kolinère.Sak la fé laba i pé fé in pé partou pou pa ké nou lé dézarmé kan néna dë moi d’séshrèss.

Final de konte mwin néna dan l’idé k’in pé la zamé pran o sèryé lavèrtissman Paul vergès épi toute son bande rapor, é toute lo bande mézir li la domande k’i pran issi La Rényon, laba dan la franss épi in pé ayèr.

Finalman ni pèye zordi lo mank prévoiyans déssèrtin pouvoir é mi domande amwin ankor si zordi néna poin in pé i fé konmsi lo réshofman klimatik i égziss pa, la zamé égzisté.finalman si sa la pa in l’invanssion Paul Vergès.

A bon ékoutèr-salu.