Oté

Kuba, péi Fidel Castro i sava ède bann péi dann La Kriz sanitèr

Justin / 27 mars 2020

JPEG - 43.6 ko

Mé zami, mi sort agard dsi bann rézo sosio in spéktak, mi pé dir azot, sa la mouye mon zyé. Kosa lété ? Lété l’arivé sinkant troi pèrsonèl santé kubin la vni donn kou d’min demoun l’Italie bien anbété avèk la kriz sanitèr lo korona-virus.. Mi pans zot i koné dann kèl tablatir bann zitalien i lé é mi pans zot la fine antann dopi plizyèr zour laba néna ziska zordi plis mor ké la fé dan La chine-l’androi la kriz la komansé.

Oui mé zami, Kuba i vien ède l’Italie : l’Itali in gran péi éropéin modèrn, é Kuba in gran zantiy avèk moins demoun ké l’Italie, avèk in nivo dévlopman infèryèr. Kuba in péi bloké partou par bann zamérikin. L’Italie konplis avèk l’érop par raport lo blokus amérikin. L’Italie troizyème puisans ékonomik éropéene.

Mé oila, kan l’amérik la blok Kuba é kann La russie l’arète ède lo péi té zot alyé dann la mèr dé Zantiy, Fidèl Castro la di, son péi i sava ète inn grann puisans médikal rokoni dan lo mond pou son l’indisti médikaman, pou la coopérasyon médikal avèk in bon pé péi. In pti rapèl : sé bann kubin la parti pou débarass l’afrik avèk lo virus d’Ebola, sé li ké la ède bann péi l’éstrème oryan pou bate atèr lo Sras épi lo virus H1N1, sé bann kubin la vni près an promyé pou ède bann shinoi débarass azot avèk lo corona virus.-Sé bann kubin la fabrik l’interféron la bien ède pou konbate lo covi-19.

Sé dir azot pou kosa kan moin la vi bann Kubin avèk zot drapo désann l’avyon, lé normal mon zyé la mouyé é mi pans in bon pé d’moun lété konm moin dovan lo bann zésploi in pti péi konmsa-pli gran ké La Rényon mé avèk solman 14 milyon d’moun-l’ariv a fé.

Aprésa moin la parti rogard in pé bann kubin dann lo mond antyé : 200 dann l’éspagn, plizyèr dizène dann Vénézuéla, plizyèr dann la dominik. Figir azot plizyèr dépité fransé la domann gouvènman di bann kubin ède bann frans é bate lo corona virus atèr.

Mi arète la, mé si zot i gingn lir in pé Granma, suiv l’aktyalité pars sak bann kubin la gingn fèr, mi pans sa i doi rann anou léspoir nou osi fé kékshoz pou nout péi é kékshoz bien siouplé.