Lo pti papyé
Mi sorte lir dann in zournal, la polis la parti fé in pérkizisyon dann gran kaz madam Bettancourt. Pou kossa ankor ? Kossa k’i rode ? I parétré, la zistis l’apré rode in bann ti modékri son kolaboratèr té i mète dann son linz pou évite aèl pa trouv la répons kan in zournalis fourné nora poz in késtyon. I rakont mèm, banna té obliz aèl aprann par kèr lo modékri épi résite avèk zot. Konm marmay lékol dizon ! La polis i rode sa, pou la zistis konète si vyé madam-la l’avé ankor konm di lo kont "toute-sa-tète".Pou oir, si in pé téi profite pa dsi èl pou fé zot min long déssi son byin. I prétan dir bann moun konmsa i apèl bann abizèr dsi la féblèss demoun.

Partou na sa ga !
A s’ki prétan dann Konsèy rézyonal épi mèm dann l’UMP, nana dé l’amontrèr i sorte la France épi i vyin pou fé l’éstaz lo prézidan, épi lo bann farsèr k’i antour ali. Kossa i aprann azot ? I aprann azot in bann ti répons k’i réponn pa aryin, zis pou éskiv la vérité. Mon kamarad Zanbash la di amoin konmsa, d’apré li, so bann amontrèr-la lé kanifyé dann lo coaching. Zot i sava partou, dann gouvèrnman, dann l’antropriz Loréal, dann l’UMP, épi ossi dann Konsèy réjyonal. Partou zot i fé la mèm shoz. I fé résité ziska ! Sé pou sa lo bann kozman nana konm k’i diré in èr déza vi, déza antandi. Mé zot i koné Zanbash ? Li égjajèr touzour in pé. Mé antansyon kant mèm ! Pars, i koné pa domin… mazine in kou in pé d’mal intansyoné, i port plinte pou abizmannn féblèss. I koné pa sas k’i pé arivé.

Justin