Pou komansé, tout bann zournal, bann radio, bann télé i tonm dési li. In vyolèr, in moun san réspé, in mal lapin patanté. Arzout èk sa in rishar, in boug na gran pouvoir k’i kroi tout lé posib. An kontrèr d’li, in mayon fèb, san soutien, in l’émigré l’Afrik viktime tout sort z’afèr. Lo prokirèr tribinal i pans li nana dann son min in n’afèr i sava amène ali a an avoir in gran déstin. I sifi li suiv roulo konprésèr k’i doi, solon tout demoun amène DSK pou vint-an dann in prizon, sansa obliz ali tir son gro larzan. Lé shoz i roul ron ! Lo blan i vien noir é lo noir i vien blan.

Toudinkou, l’afèr i kass in viraz san-katrovin dégré. Lo prokirèr li-mèm i anvoy nouvèl l’afèr pou dé gran zournal l’Amérik. So kou isi, sé baton k’i shanj de boute. Lo fam de shanm la manti dési tout la lign. El la kalkil mantèr dési son rosours, dési son frékantasyon, dési sak la spasé dann l’otèl Sofitel. I di mèm, èl i frékant la mafia. I di osi li sava dann bann shanm pa arienk pou nétoiyé (zot i suiv amoin ?). El la manti galman dési sak èl la fé dépi l’ariv lo z’afèr ziska k’èl i sava rakont lo zistoir son shèf. L’èr-la, tout bann zournal i dévir palto. Bann gran éspésyalis dann tout lé z’éspésyalité i koz, i rakont, i tir konklizyon. Lo blan i arvien blan é lo noir i arvien noir. La viktoir la vérité dési lo mansonz ! La viktoir lo bien dési lo mal !

Mé l’afèr lé tro zoli ! L’afèr lé tro bèl ! Pars in pé la fine tir bénéfis san dépansé dési sa. Mme Lagarde la fine ranplas lo boug konm diréktris lo FMI. Sarkozy la fine bate tanbour dési la viktoir la France épi la viktoir in fanm. Lo bann bon doktèr lo FMI i ropran favèr. Lo dyé dolar, ou i parl si li réyone. L’èr-la, si lé posib done bann chakal in dépouye pou déshir rantre zot, lé bon. A ! Mi pé dir azot, banna i mank ar pa bien goute la dépouye la polis va done azot par gro doz, ti-porsyon ! Kansréti arienk in zo pou sisé !

Justin