Na dé foi, ou i pans déssèrtènn batay, lé fine sort dan l’aktyalité. Ou i majine sa lé déyèr ou é la pa bézoin gaspiy out fors, fé lèv oute kardyak, pou sobate, pou in konba lé fine passé é dépassé. Mé kan ou i kroi sa, tou d’in kou, ou i apèrsoi lé pa vré san-pour-san.

La kant mèm fine byin avansé !

Nana touzour in gran kantité d’moun i koz kréol rényoné. Koz kréol rényoné, lé pi la prèv ké ou i mank la kiltir, sansa l’instriksyon. Nout lang kréol i porte nout kiltir dsi son do. Mèm lékol la rouv in pé inn-dé pti fénète pou lès nout lang é nout kiltir rantré. Ou i pé maryé, an kréol rényoné si ou i vé. Déssèrtènn méri la sign la sharte pou réspèk la lang demoun. Par raporte lo tan lontan, ou i pé dir la fine byin avansé.

Tansyon, pangar !

Zot i koné byin, souvan dé foi, la brèz i kouv sou la sann. Kan ou i kroi ou la fine gingn in konba, i fo arkomans ali, pars ou la pa gingn sa pou toultan. Mi doute pa ké dann fon z’ot kèr, nana in bon paké d’moun i rèv armète la boul dann milyé lo ron, artourn an aryèr. Kisa k’i koné si-fasonn parlé !-lo fouète madam Desbassyns lé pa kashyète par-la é in pé i rèv pa ansèrv anou sa in zour !

Dizon in konba konm sète la lang kréol rényoné, sa i gingn pa solman dann biro, dann gayar liv, dann sobatkoz rantre nou... Sa i gingn dann kèr lo pèp rényoné, dann son volonté pou lite pou son l’idantité. I fo, sa i dovyin, pou anploye in gran mo, "la cause du peuple". L’afèr lo pèp rényoné, son afèr !

Justin