Astèr alon solman parl in pé dsu l’Alzéri pars laba galman la fète lo 8 mé, mé fète-la l’avé in gou d’san vèrssé a tort, in gou d’inzistis épi d’lopréssion. Kèl l’androi sa la spassé ? Sa la spass dann bann vil i apèl Sétif*, Guelma,Kherrata kan 45000 moune l’Alzéri la trouv la mor. Pou bande l’Alzéri l’avé pliss ké sa, é pou La franss l’avé moins ké sa. La plipar d’tan la komanss par in manifèstassion passifik aprésa la vni pli grav kan bande patriyote lo péi la réklame l’indépandanss. San obliyé téi domande la libérassion Messali Hadj lo shèf in gran parti indépandantist té karséré an ba laba dann kongo.

Demoune lété pa armé,mé bande solda franssé l’été épi bande milissien éropéin galman-pars laba l’avé par-la in milyon d’moune téi apèl azot éropéin. Zot lété toute sof zarab, bèrbère épi d’ote poplilassion téi sorte l’ote koté la Mer Méditérané é zot la sèrv zot zarm bien pliss k’i fo-mèm san rézon pou bande miliss. Toussala, dann in péi, anparmi in pèp, l’avé soutien la franss épi son bande zalyé konte zot bande zénmi dann la grande guèr 1939-1945.

Biensir La Franss si èl lété dan l’obligassion rokonète l’indépandanss son l’anssien koloni l’ané 1962, la zamé rokonète lo massak bande zalzérien. Koté franssé la fé paré t’il a popré san mor, é koté l’alzéri, mi sorte dir... Si mi di okin Prézidan franssé la pa rogrète piblikman lo massak, lé pa vré pars Hollande la rokonète mé san pliss ké sa. Antouléka, mwin ké la antande lo kozman Méssyé Makron la fé dèrnyé 8 mé ou sansa akoté li la pa anparl de sa.

L’Alzéri avèk la Franss lé touzour fashé par raporte sa épi sak l’ariv apré dann la vré guèr lindépandanss l’aklzéri. Mwin sré tanté d’dir : avan fète la fin la dézyèm guèr mondyal konm la fété, alé rékonsilyé avèk noute frèr l’Alzéri pars sé konmsi lé pli fassil rotonbe dakor avèk bande z’ansien nazi ké avèk bande kolonizé la pa aksèpt zot dominassion. La pa pou in késtyon d’koulèr d’po, o moinss ? La pa non pli pou in késtyon d’rolizyon ?

A bon antandèr, salu !

*Le Constantinois konm i di.