Médam zé mésyé, la sosyété, koz èk moins é koz èk in kouyon, mé sé o pyé d’lo mir k’i oi lo mason. Mézami, mi koné pa si zot i yèm bann gran kozman ds i lamour, dsi l’amityé mé sak mi koné sé sirman ké zot i domann azot, dann zot kèr, si lo diskourèr lé sinsèr otroman si li lé pa. La plipar d’tan ni pans é sa i doizète bien vré, bann santiman-la néna zot motèr pa dann kozman mé dann sak désèrtin i apèl l’am é d’ot i apèl sa lo kèr. Mi rapèl, dann in shanté Fourcade néna bann parol konmsa : « Provik k’mi yèm, provik k’mi viv, mi pran la vi konm li ariv, lo zour la nuite lé ttouzour pa rèye, mon kèr lé konm in kèr d’solèye. ». Zot la bien antann : mon kèr lé konm in kèr d’solèye. Mi kite azot rofléshi la dsi é ni artrouv pli d’van. Sipétadyé.