Matant Zélida la ékrir Justin :

Mon shèr nové, mon spès salté, rouj de fon dovan l’étèrnité moin lé a d’mandé pou kosa zot i fé l’amayaz avèk l’amannman Virapoullé. Sépa si sé pars sé Virapoullé an pèrsone la fé mète sa dann la konstitisyon(l’artik 73) ? Sépa pars la di dann tan sa té in tiktak pou anpèsh sépar La Rényon avèk La Frans ? An touléka, mi ansouvien Zan-Pol l’avé di i fo La Rényon lé konm n’inport ékèl départman fransé, ni plis ni moins. I diré sa i donn bann rouj de fon in kékshoz i rosanm la vérète. An touléka, zot i vé, zot i vé pa, lé konmsa é lé pa otroman. Tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèr moin lé a d’mandé si zot i rofléshi bien sak zot i di. Sa lé vré pou ou, konm tout bann politisien la droite.
Rann aou kont mon vyé matant, zot i vé La Rényon lé parèye n’inport ékèl départman La Frans. Poitan nou néna kant mèm in bonpé éspésifisité :
- Nou lé isi dann l’oséan indien, nou néna in klima tropikal, nou la konète l’ésklavaz la moityé nout l’istoir, nou la konète l’angajis é pi la dominasyon kolonyal. Donk i bonpé éspésifisité par raport bann départman La Frans.
- Ni koz kréol dann nout gran majorité é nout kiltir la pa la kiltir bann départman fransé. Ni fé parti l’indyanoséanité. Nout popilasyon i sort partou é kan ou i pans bien nou lé pa dévlopé konm La Frans. Alor, ète konm n’inport ékèl départman fransé sa la poinn sans vi nout sityasion anou.
Si l’amanman Virapoullé i vé blok anou dann l’éta ni lé, mèm i anfan tann i pékonprann ni pé pa fé nout l’avnir konm sa ké ou i vé, ké ou i vé pa. Tok ! Pran sa pou ou !