Sirman L’Ukraine la panss larzan li téi gingn té an kado é sirman li téi kroi pa oplisss li téi gingn larzan opliss li l’avé in dète pars zamé d’la vi sa té di konmsa. Ariv in nouvo Prézidan dann Zétazini oila ké li di, i fo rann ali son larzan é par milyar é konm L’Ukraine na poin larzan lo Zétazini i domann la moityé son rossours néna dann sol konm liranium, konm lo litium, épi d’ote ankor. Arzoute èk sa lo Zétazini i vé fé in groupman bann sossyété kapitalist pou rokonstrui lo péi kan l’èr v’arivé an pliman lo péi bien antadi.

Koman i apèl sa ? Mi panss sa i apèl in nouvo kolonyalism é sistèm-la i intérèss ziska déssèrtin miniss konm Elon Musk k’i vé pa done son par lo shien épi rante dann ta pou ésploite lo péi soidizan ami. Romarke anou bien néna lontan l’Amérik i fé konmsa é shak foi zot la rante an guèr zot la sèrv azot dsi bann péi épikan zot la vi sai raporte pa zot otan ké zot i vé gagné ébin zot la lèv zot kan épi la parti. La guèr sé lésploitssion kapitalist par d’ote moiyin.

Koman lé shoz va tourné ? Ni tarde pa konète. Ni tarde pa konète non pli si bann l’érop zot ossi talèr i vé pa tir zot tare dsi L’Ukraine. Mi panss ké non mé lo sistèm kapitalist sé lo sistème kapitalist é lésploitassion sé touzour lésploitassion. Alor siouplé arète kroir in koté néna lo bon kan épi l’ote koté lo mové kan, in koté sak lé intéréssé épi sak lé pa. Alon dir la guèr sé lésploitassion kapitalist avèk d’ote moiyin. An tou lé ka sa lé bien vré pou Zétazini k’i propoz L’Ukraine son néokolonyalism.

A bon antandèr salu !

Justin