Mézami, zot i koné l’amérik-la, sa in gran péi lé défandi mantir pou bande zom d’éta dé. Si wi manti é si demoune i antann aou, wi pèrde oute post prézidan. Lo kode pénal dan La franss i otorize aou manti si sé pou pa fé kondane oute famiye, é laba, dann l’amérik in loi konstitisyonèl i obliz aou di la vérité. Par konte wi pé tronpé.

Si zot i rapèl kan la fé in gran sobatkoz dsi la bonb atomik dann l’Irak, é lo lakizatèr lété lo sokrétèr d’éta amérikin. Lo boug lété klèr vèye pa koman, é li l’amontr par A+B ké l’Irak l’avé la bonb atomik ; par kontr Israël l’avé poin. Aprésa la fé la guèr l’Irak é biensir l’Irak la pèrde mé kan la rode lo lyé sansa landroi téi fé la bonb atomik, lo lyé té i anrishi l’uranium pou fé la bonb la pa trouvé. In érère d’apré sak toulmoun i kroi. Pa in mansonz pars lé défandu mantir dann gran péi démokratik-la.

Somenn passé lo bande nouvèl lété pa bon dann l’afghanistan. Bande Taliban téi atak partou, é toulmoune téi ékoute sak l’amérik téi sava dir. Normal pars sé l’amérik lo shèf laba-anfin l’été-, pars sé son sèrviss sogré k’i koné o poin pré toute sak i éspass dann péi-la. Téi koné mèm lo péi téi pé s’an pass lo soutien larmé amérikène. Joe Biden la di é sa la rassir toulmoune, konm de koi pou lo gouvèrnman lo péril lété pa iminan.

Toulmoune té rassuré sof lo prézidan afghan li mèm ké la sové ziss avan bande taliban i rante dann lo palé é i vien fé tok ! tok ! tok ! dsi la porte son biro vide. É kan li la parti, li la di, Taliban la gingn la parti. Pa in mansonze amérikin, non ! Arienk in l’érèr.

Mé in lérèr i pé koute shèr in paké d’moune.kissa ? Dabor toute bande moune téi ansèrv tradiktèr-lir éspion-pou lo l’armé amérikène, toute bande madam la gingn alé lékol, épi la travaye, toute bande jenn fiye téi vé pa maryé forssé avèk in moune dézigné par zot famiy, toute bande solda l’armé afghane toute sak la fé buiznèss avèk larmé amérikène. Anfin do koi okipe bande tribinal islamik o moinss pandan sizan – lo tann pou pèrde lo pouvoir.

A ! Oui mé Oussana Ben Laden lé bien mor li o moinss ? Mollah Omar la trépassé – mi panss ? Donk l’Amérik la gagné alor ? Si i pé di, lé shoze konmsa. Sof érèr de la par bann zamérikin zot tousèl lé kapabe armète lo pyé laba, sirtou ké néna la moné pou gagné.