Sak té i pans avèk Obama lé shoz nora marsh in pé byin dann l’Amérik, mi pans zordi zot i doi an avoir in pé-bokou dézéspoir dann kèr. Mi vé pa parl déssi la politik intèryèr lo péi, pars la-dan nana lo méyèr, konm lo pli-pir. Mi vé koz déssi la politik étranzèr. An partikilyé la guèr dann péi lé zot.

Déga bann z’Amérikin i fé dann l’Irak
Nana in site internet, plis-ou-moins klandéstin, i mète o féklèr lo bann bavir l’armé amérikène dann péi l’Irak. Lé pa zoli sak banna la fé ! Pa aryink kan George Bush lété prézidan, mé galman dépi Obama lé prézidan ; La-dan i anparl la tortir, lo bombardaz bann vilaz la pa fé aryin pou alime la guèr, lo vyol bann moun, épi tout kalité trafik. I anparl galman koman bann mèrsnèr, soidizan la-ba pou protèz la popilasyon, i téroriz demoun, konm ou, konm moin, la pa domann i fé la guèr dann zot péi.

Toush pa mon mashine pou tyé !
Gouvèrnman amérikin i koné sa, mé solman li la pa fé aryin pou fé arété. Sèl z’afèr madam Clinton, sokrétèr d’Etat, donkalor in minis inportan, la di : « Antansyon, so bann révélasyon lé riskab mète dann danzé la vi bann solda amérikin ! ». La lé bèl la ! É bin, koué k’i fé avèk la sékirité bann sivil dann bann péi lé dan la guèr ? Sate zot i kont pi alors ? Sak i konte, sé protèz la mashine pou tyé, pou oprimé, pou kraz out dignité kou d’pyé. Bin, lé zoli, bravo lo monn lib, é bravo lo péi komandèr.

Bann Méksikin, nana lontan téi di : « Pov Mexique, si éloigné d’Bon Dyé, tro a koté l’Amérik ! ». Pli pir, koméla, sa lé mondyalizé, mèm si ou lé loin l’Amérik, partou ousa ou i lé, la mashine infèrnal lé tèrla koté ou.

Justin